Walang aasahang glorya

SA ika-walong State of the Nation Address (SONA) ni Pangulong Arroyo suki ay mapapansin ang magagandang accomplishments na kanyang binibigkas sa panahon ng kanyang panunungkulan. Matalino, magaling na lider at ang karisma na ito ang dahilan kung bakit hanggang sa ngayon ay hindi pa rin siya mabitawan ni Uncle Sam.

Hindi na manhid si Juan de la Cruz sa nangyayari sa ating kapaligiran suki. Kung ano man ang magaganda at makabuluhang salita na binitawan ni PGMA sa kanyang SONA ay tanging si Juan de la Cruz lamang ang makapagsasabi kung totoo o puno ng kaplastikan ang bawat litanya na kanyang binigkas sa harap ng libo-libong hinatak na kaalyado sa loob ng plenaryo.

Ang napabalitang ginastos na halagang Php 90M para pagandahin ang loob ng House of Representatives para sa SONA ni Ate Glo ay nakapagpataas ng kilay ng ilang kritiko ng administrasyon. Napakalaking halaga kung tutuusin para pakainin ang mga nagugutom na masa.

Natatandaan ko pa suki ang mga binitawang salita ni Ate Glo sa kanyang SONA noong nakaraang 2001. Kahit may halong pagdududa ay ninais ng inyong lingkod na ipokus ang pakikinig sa isang litanya na nakapagpakislot ng aking dibdib. Noong sabihin ni PGMA na bababa ang korupsyon sa gobyerno at mas palalawigin ang industriya ng agrikultura, analisa ng inyong lingkod na siya na siguro ang lider na hinihintay natin para maisalba ang kahirapan ng naghihingalo nating bansa.

Taliwas sa inaasahan ng sambayanang Filipino, nakita na natin suki ang pruweba sa pamunuan ni Pangulong Gloria Macapagal Arroyo.

Paano matutupad ang sinasabi niyang palalawigin ang industriya ng agrikultura? Nasaan na suki ang nawawala na mahigit sa Php 700M na fertilizer fund scam na dapat sana ay pakikinabangan ng ating mahihirap na magsasaka. Kalokohan suki na itanggi ito ng palasyo dahil kitang-kita ang ebidensya na pagtatago na animo isang daga ni dating Agriculture Undersecretary Jocelyn “Joc-Joc” Bolante sa lungga ng mga puting dayuhan.

Paano din ipaliliwanag ni PGMA ang sinasabi niya noon na bababa ang kurapsyon sa pamahalaan samantalang dawit ang kanyang malalapit na kaalyado at kamag-anak sa maanomalyang kontrata ng administrasyon at tsekwang kompanya na ZTE Corporation tungkol sa National Broadband Network (NBN) project.

Napatigil ang maanomalyang proyektong ito suki ng parang bombang sumambulat ang isyu ng malaking suhulan at overpricing na kinasasangkutan nina dating Comelec Chairman Benjamin Abalos at ng asawa ni Pangulong Arroyo na si First Gentleman Mike Arroyo.

Dapat binanggit ni PGMA sa kanyang SONA na isa sa dahilan kung bakit tayo kinakapos ngayon ng supply ng bigas ay dahil sa matinding kurapsyon sa kanyang pamunuan. Kung hindi sana ninakaw suki ng mga tulisan sa ating pamahalaan ang fertilizer fund ay ito sana suki ang magbibigay ng pondo para ibili ng abono o pataba ng mga magsasaka para gamitin sa pagpapalakas ng ani ng palay. Hindi sana tayo kakapusin ng bigas at maaari na hindi na binigkas ni Aling Gloria sa kanyang nakaraang SONA na panahon pa daw ng kastila ay naaangkat na tayo ng bigas sa ibang bansa.

Ano ang resulta suki? Sa halip na lumaki o lumakas ang ani ng palay ay parang pila sa pagtaya sa Lotto ang nangyayari ngayon sa ating mahihirap na kababayan. Ang NFA rice na pinakamurang bigas sa merkado ay pinipilahan na ngayon ng masa para lamang may pagsaluhan sila sa hapag-kainan.

Kung may sapat na ani ng palay ay hindi magugutom ang ating mga kababayan kahit sabihin pa na damay ang ating bansa sa global crisis.

Sa naganap na SONA ay inabot daw ng 106 na palakpak mula sa hakot na kaalyado ng palasyo ang mga salitang nagbigay inspirasyon para makumpleto ang araw ng pangulo.

Humaba lalo ang palakpakan ng banggitin ni PGMA na gagawin na lamang 50 sentimos ang halaga ng text o short message service (SMS) mula sa piso. Alam naman ninyo suki, isa sa magandang libangan ngayon ng mga pinoy ay ang mag-text at ang Pilipinas ay napaulat na itinuring bilang text capital of the world. Tinatayang nasa 400 milyong text ang ibinabato ng mga pinoy kada araw, sino nga ba naman ang hindi matutuwa sa sinabi ni Ate Glo?

Ang hindi alam ng nakararaming masa, pansamantala lamang ang kagalakan na kanilang madarama sa pambobola ni Ate Glo. Promo lamang pala ng mga telecommunication company ang 50 sentimos na binabanggit ni PGMA sa kanyang SONA at magsisimula ito ngayong buwang ito ng Agosto hanggang sa darating na buwan ng Oktubre....he he he...

Ipinaliwanag din ni PGMA ang kahalagahan ng Value Added Tax (VAT) sa langis at kuryente kaya hindi niya ito matanggal. Kung aalisin daw kasi suki ang VAT ay mawawala ang Php 80 Bilyon para sa mahihirap.

oOo

Masarap pakinggan ang mga litanyang binibitiwan ni Pangulong Arroyo sa kanyang SONA, ngunit lahat ng ito ay burado sa pananaw ng masa. Patuloy ang pagtaas ng bilihin at langis, kakarampot ang sahod ng manggagawa ngunit ang pangunahing bilihin para sa kanilang hapag-kainan ay patuloy din ang pagsirit ng presyo. Madami ang nagugutom dahil sa kakulangan ng hanapbuhay at dahil dito ay tumataas ang krimen.

Kung kailan magkakameron ng pagbabago sa ating sistema ay hindi ko alam suki. Parang suntok sa buwan ang ating pakikipagsapalaran sa isang gobyerno na pulos katiwalian at kasinungalingan.

Habang lahat ng nakaluklok sa pamahalaan ay hindi magkakameron ng tunay na pagkatakot sa Diyos, siguradong walang mangyayari dahil ang mamamayani pa rin sa kanilang mga puso ay pag-iimbot sa kapwa at pansariling interes para sa kanilang kagalingan.

oOo

Maraming isyu na dapat kalampagin sa lalawigan ng Cavite. Nagkalat ang mga kolorum na pampasaherong bus at mini-bus suki. Sa katunayan, malakas ang loob ng mga ito dahil protektado daw ito ng mga buwaya sa katihan mula sa hanay ng tiwaling namumuno sa LTFRB, LTO at Cavite Traffic Management Office o CTMO. Sa Katunayan suki, isang bus driver ang inireklamo ng inyong lingkod kamakailan dahil sa pagmamaneho nito ng walang pakundangan. Sinagasaan ng abusadong bus driver ng Safeway Liner na may plakang DXB-746 ang nakaimbak na tubig sa gilid ng kalye sanhi ng malakas na pag-ulan. Dahil dito, natilamsikan ng tubig-baha at putik ang mga inosenteng nag-aabang ng masasakyan sa isang waiting shed sa lugar ng Aguinaldo Highway malapit sa Robinson's Mall sa bayan ng Imus, Cavite. Dahil isa ang inyong lingkod sa biktima ng hinayupak na bus driver, agaran nating tinawagan ang tanggapan ng CTMO para ireklamo ang abusadong bus driver.

Dagliang umaksyon ang grupo ng CTMO at ipinaalarma sa pamamagitan ng kanilang mga radio ang nasabing bus, hinarang ng mga traffic enforcer ang inirereklamong bus driver na may biyahe papuntang Baclaran ngunit sa halip na huminto ay sinagasaan pa nito ang mga CTMO traffic enforcers na muntik ng madisgrasya dahil sa kapalaluan ng aroganteng bus driver. Ayon sa deputy ng CTMO, nakikikabit lang daw ng linya ang nasabing bus company. Hindi na daw bumalik ang bus galing Manila kaya hindi na nila ito nahuli. Mahirap talagang arestuhin suki kapag may nasa likod na mahilig sa cash-sunduan. Ito ang ating bubusisiin sa mga susunod na isyu suki. Hawak ng inyong lingkod ang listahan ng mga plate nos. ng kolorum na bus at mini-bus na pumapasada sa lalawigan ng Cavite mula Zapote at Baclaran. Magkano kaya suki ang lingguhang abuloy na inihahatag ng mga ito sa mga buwayang naglipana sa katihan? Abangan....

oOo

Kung may reaksyon, reklamo o suhestiyon...text lamang po kayo sa 0906-5582848 o magpadala ng mensahe sa E-mail address ng inyong lingkod sa junmaligalig@yahoo.com. Trabaho po lamang at walang personalan. 

Other Stories

• Balitang Patas By Atty. Batas Mauricio

• Letters from Port Moresby By Alfredo P. Hernandez

• The Next President By Bishop Bert Mercado

• Ligaligin Natin By Jun Maligalig

• PerryScope By Perry Diaz

• Sola Scriptura  By Kent Avestruz

• OLD BOSSES NEVER DIE THEY JUST SIT ON THEIR ASSET By Melcor Virata

  Reading for the Day